Ես վաղուց զգուշացնում էի, բայց հիմա կարող եմ ասել՝ եթե Նիկոլ Փաշինյանը շարունակի մնալ իշխանության, այս թեման կդառնա օրակարգ։ Փաշինյանի իշխանության տակ ադրբեջանցի հատուկ ջոկատայիններն ու պատրաստված խմբերը կգան Հայաստան և կտեղավորվեն այստեղ՝ շատ «խաղաղ» ձևով։
Սա, ցավոք, արդեն հստակ է։ Ովքեր ուզում են թախտին նստել ու սպասել բախտին կամ դեռ իրենց համոզել, որ կան բաներ, որոնց Փաշինյանը ունակ չէ, պետք է հասկանան, որ մի օր կանգնեն իրենց իրերի առջև ու կմեկնեն այլ երկիր՝ փախուստի մեջ։ Քանի դեռ կարող ենք մեր երկիրը պահել ու պաշտպանել քաղաքական մեթոդներով, պետք է անենք դա, իսկ դրա միակ ճանապարհը Փաշինյանին իշխանությունից զրկելն է։ Այս գործը կարող է անել միայն ՀՀ-ում ապրող ՀՀ քաղաքացին՝ իր դիրքորոշմամբ, քվեով ու հստակ վերաբերմունքով։
Ասածիս ապացույցն Իլհամ Ալիևի այսօրվա ելույթն է։ Այս թեման աննախադեպ տարածում է ստացել Ադրբեջանում, իսկ ՀՀ-ի լռությունը ինքնին շատ խոսուն է։
Ալիևը բառացիորեն ասում է, որ «Հայերի վերաբնակեցումից հետո Ադրբեջանի նախնիների հողերում՝ 1905-1907, 1918-1921, 1948-1953 և 1987-1991 թվականներին ադրբեջանցիների դեմ իրականացված կոտորածների և անօրինական վերաբնակեցման հետևանքով մեր հարյուր հազարավոր հայրենակիցներ լքեցին իրենց հայրենիքը և ապաստան գտան Ադրբեջանում»։
Այսինքն՝ նա պնդում է, որ ադրբեջանցիների «վերադարձը» Հայաստան՝ «մշակութային ժառանգության վերականգնման» պատրվակով, իրենց հայրենիքի վրա ունեցած իրավունքի իրականացումն է։ Նա պնդում է, որ սա անհրաժեշտ է «թշնամանքի էջը փակելու և ժողովուրդների միջև փոխըմբռնման համար»։
Հիշեք, որ սա ասում է մի բռնապետ, ով Արցախի ու Հայաստանի դեմ ձեռնարկեց պատերազմներ, բլոկադա, էթնիկ զտում, բռնի տեղահանում ու ամեն ինչ արեց, որ Արցախում «խաղաղություն» հաստատվի առանց հայերի։ Նրա խոսքերը պետք է ընկալել որպես ոչ թե խաղաղության առաջարկ, այլ ռազմավարական նպատակների հայտարարություն։
Այս պլանը ոչ թե հեռու է։ Այն արդեն իսկ ծրագրված է, և մենք պետք է հասկանանք, որ Փաշինյանի իշխանության տակ Հայաստանը դառնալու է ոչ թե անկախ պետություն, այլ Ադրբեջանի ազդեցության գոտու մաս։
